Nagtuturo si Will sa Departamento ng Filipino at Panitikan ng Pilipinas, UP Diliman sa larangan ng Malikhaing Pagsulat. Nagkamit na siya ng mga parangal mula sa Palanca Memorial Awards at ang kanyang aklat na Bugtong ng Buwan at Iba pang Kuwento (UP Press, 2011) ay nagawaran ng Madrigal-Gonzalez First Book Award, mga maiikling kuwento ukol sa batang manggagawa. Nakatutok sa tinatawag niyang kagila-gilalas na realismong bayan ang kanyang mga panulat tulad ng Ang Pagbabalik ni Maria Makiling Unang Aklat (UP Press 2015), Si Maria Makiling at ang Alamat ng Animas Anya (UP Press, 2018), Ikalawang Aklat, Ang Lihim ng Lagusang Dalem (UP Press, 2024) at ang huli sa tetralohiya ng mga nobelang Makiling—Si Maria Makiling sa Sinapupunan ng Hukluban ay nailathala ngayong 2025.
Isisilang din ngayong taon ang nobelang Mito/s, YA nobela ukol sa kasaysayan at kapangyarihan. Gayundin, inaasahang mailunsad ang antolohiya ng mga sanaysay/malikhaing di-piksiyon ukol sa patograpiya, ang Sakit ng Kalingkingan: Patograpiya ng Katawan, Damdamin at Isipan. Isa siya sa mga editor ng antolohiyang ito.
Tagapamahalang Opisyal si Will sa Sentro ng Wikang Filipino-UPD. Naging kawaksing editor siya ng mga dyornal na Agos at Daluyan ng SWF.
Nalathala na rin ang kanyang mga artikulo ukol sa panitikang pambata rito at sa labas ng bansa. Nakatuon ang kanyang mga panulat at pananaliksik sa usapin ng bata, babae, bayan at ang kagila-gilalas.